Ipinagmalaki ng Department of Agriculture (DA) na nananatiling normal ang presyo ng mga pangunahing bilihin sa bansa at mas mababa pa umano nooong nakalipas na Kapaskuhan.

Sa report na ipinadala ni Assistant Secretary Salvador Salacup kay DA Secretary Arthur Yap, na base sa nakalipas na buwang pagbabantay ng ahensya sa mga pamilihan ay normal at walang anumang pagtataas sa presyo ng bi­lihin.

Inihalimbawa pa nito ang presyo ng regular milled rice na P30 kada kilo na lamang na mas mababa kung ikukumpara sa nakalipas na buwan na P32 kada kilo.

Habang sa presyo naman ng mga gulay ay nakapagtala ang DA ng pa­nibagong pagbagsak sa presyo nito simula pa noong panahon ng Kapaskuhan hanggang sa kasalukuyan.

Umaabot umano sa P5.00 hanggang P20.00 kada kilo ang ibinawas na presyo sa sibuyas, sitaw, ampalaya at iba pang uri ng gulay.

Samantala, ang presyo naman ng refined sugar ay nananatili ang presyo nito na P36 kada kilo; habang ang washed sugar ay P34; at brown sugar na P30.

Maging ang presyo ng karneng baboy at manok at isda ay walang pagbabago sa presyo nito.

Sinabi pa ni Salacup na may makakatipid ang sinumang mamimili kung pupunta sa mga 13 bagsakan centers o drop-off points sa Metro Manila kung saan mas mababa ang presyo ng mga panguna­hing bilihin.